Putin Paşinyanla ikitərəfli görüş keçirib

Rusiya Prezidenti Vladimir Putin Ermənistanın Baş naziri Nikol Paşinyanla Sankt-Peterburqda ikitərəfli görüş keçirib.

Bu barədə Rusiya mediası məlumat yayıb.

Görüş Paşinyanın Ali Avrasiya İqtisadi Şurasının iclasında və MDB dövlət başçılarının qeyri-rəsmi sammitində iştirak etmək üçün Sankt-Peterburqa səfəri çərçivəsində baş tutub.

Paşinyan görüş zamanı Rusiya lideri Vladimir Putinə "Tramp Marşrutu" layihəsi barədə məlumat verib.

"Hazırda biz ABŞ ilə TRIPP layihəsinin icrasına və tikintiyə başlanılması ilə bağlı çox konstruktiv ikitərəfli danışıqlar aparırıq. Bu, həqiqətən də bizim regionumuzda çox böyük və məzmunlu dəyişikliklərdir. Burada Rusiya ilə ikitərəfli münasibətlərimizə aid bir çox məqamlar var. Məncə, bu gün bütün bunları müzakirə etmək üçün çox yaxşı fürsətdir", – deyə Paşinyan vurğulayıb.

O qeyd edib ki, Azərbaycanla Ermənistan arasında sülh sazişinin imzalanması Rusiya ilə münasibətlərin inkişafı üçün yeni imkanlar açacaq.

"Biz 8 avqustda keçirilən Vaşinqton sammitindən sonra telefon danışığımızda qeyd etmişdik, əldə olunmuş sülh Ermənistan və Rusiya arasında ikitərəfli münasibətlərin daha da inkişafı üçün yeni imkanlar açır. Bu, artıq baş verib, çünki qatarlar Rusiyadan Ermənistana Azərbaycan üzərindən tranzitlə gəlməyə başlayıb", – deyə Paşinyan bildirib.

Öz növbəsində, Rusiya Prezidenti Vladimir Putin qeyd edib ki, Moskva və İrəvan arasında münasibətlər inkişaf edir, qarşılıqlı ticarət dövriyyəsi göstəriciləri isə təshih edilib. O həmçinin atom enerjisi sahəsində layihələr də daxil olmaqla, energetika sahəsində əməkdaşlıq üçün yaxşı perspektivlərin olduğunu vurğulayıb.