QAİ sözçüsü erməni nümayəndəni susdurdu | BMT-nin tədbirində gərginlik

“Qərbi Azərbaycan İcmasının Ermənistan hökuməti ilə qayıdış mövzusunda dialoqa başlamaq üçün dəfələrlə etdiyi cəhdlər cavabsız qalıb”.

Bunu İcmanın İctimaiyyətlə Əlaqələr və Qərbi Azərbaycan Televiziyası şöbəsinin müdiri Ülviyyə Zülfiqar BMT İnsan Hüquqları Şurasının 57-ci sessiyası çərçivəsində “Qayıdış hüququndan istifadə – sülh və barışıq üçün mühüm stimul kimi” mövzusunda keçirilən tədbirdə deyib.

O, çıxışında azərbaycanlıların vaxtilə mütləq əksəriyyəti təşkil etdikləri Ermənistan ərazisindən zorla qovulmasının tarixi haqqında məlumat verərək, deportasiyaların ağrılı nəticələrinin hələ də aradan qaldırılmadığını vurğulayıb.

“Ermənistan hökuməti evlərimizi, müqəddəs yerlərimizi ziyarət etməyimizə belə mane olur. Biz beynəlxalq ictimaiyyətin, xüsusilə də Birləşmiş Millətlər Təşkilatının insan hüquqları institutlarının dəstəyinə ümid edirik. Bu dəstək çox vacibdir, çünki Ermənistanın evlərimizə qayıtmağımıza törətdiyi maneələri aradan qaldırmaq üçün təkcə İcmanın səyləri kifayət etmir”, – deyə Ülviyyə Zülfiqar çıxışında bildirib.

Tədbirdə Ermənistan nümayəndəsi çıxış edərək bildirib ki, Ermənistan guya hər bir köçkün və qaçqının öz evinə qayıtmaq hüququnu dəstəkləyir.

Ermənistan nümayəndəsi Qərbi Azərbaycan ifadəsini Ermənistana qarşı ərazi iddiası kimi təqdim etməyə cəhd edib. Cavabında Ülviyyə Zülfiqar Qərbi Azərbaycan İcmasının adının tarixi və coğrafi faktlara əsaslandığını və Ermənistandan qovulan azərbaycanlıların qayıdış hüququ olduğunu deyərək bildirib ki, QHT olaraq Qərbi Azərbaycan İcmasının hər hansı dövlətə qarşı ərazi iddiası ola bilməz.

Sözçü həmçinin Qərbi Azərbaycan İcması tərəfindən Ermənistan Baş nazirinə dialoq müraciətləri ünvanlandığını xatırladıb.