Qərbdən tapşırıq alıb seçkilərdə aranı qatmaq istəyi ürəyində qaldı

Azərbaycanda növbədənkənar prezident seçkisinin əhəmiyyətini, geosiyasi miqyasa təsirini həzm edə bilməyənlər yenə hərəkətə keçib. Onlar yalnız bağlı olduğu mərkəzlərdən təlimatlar alırlar və həmin tezislərə uyğun hərəkət edirlər, ictimai rəyi çaşdırmağı qarşıya məqsəd qoyurlar.

Elə bu günlərdə Qərbin ənənəvi oyuncaq təşkilatı kimi Azərbaycan əleyhinə istifadə edilən “Seçkilərin Monitorinqi və Demokratiyanın Tədrisi Mərkəzi”nin və onun rəhbərliyində təmsil olunan Anar Məmmədlinin Qərbdən xüsusi tapşırıq alması haqda məlumat yayıldı.

Xəbərə görə, Anar Məmmədliyə seçki günü ictimai rəyi manipulyasiya etmək və neqativ məcraya yönləndirmək üçün 500 nəfər müəyyənləşdirmək, həmin adamları “seçki pozuntuları” videoları çəkmək üçün texniki avadanlıqlarla təchiz etmək tapşırılıb. Lakin necə deyərlər, bu plan suya düşüb və təlimatı hazırlayanlarla onu icra etmək öhdəliyi təyin edilən şəxslər bu istiqamətdə heç bir şeyə nail ola bilməyiblər.

İflasa uğrayan cəhdlə bağlı “Oxu.Az”a bir sıra əlavə detallar da məlum olub. Aldığımız məlumata əsasən, Anar Məmmədli səriştəsizliyini ört-basdır etmək üçün dəridən-qabıqdan çıxır. İndi o, özünü sübut etməkdən ötrü yeni plan üzərində işləyir.

Anar Məmmədli cəmi 20-30 nəfərlik təxribat qrupu formalaşdırmağa nail olub, onların əksəriyyəti “Azadlıq” qəzeti və “Azadlıq” radiosunun əməkdaşlarından ibarətdir. Lakin Anar Məmmədlinin xüsusi qruplar formalaşdırmaq cəhdləri plana uyğun nəticə vermir və o, faktiki olaraq üzərinə götürdüyü öhdəliyi yerinə yetirə bilmir.

Aldığımız məlumata görə, Anar Məmmədliyə verilən “tapşırıq” icra olunmadığından ona öz qüvvəsini jurnalist Xədicə İsmayılın “dəstəsi” ilə birləşdirmək tövsiyə olunub. Bu da çıxış yolu, daha doğrusu, növbəti fiasko. Qısası, Anar Məmmədli və onun ətrafı ağalarının istəyinə uyğun istənilən effektiv fəaliyyətə malik deyillər. Buna görə də bəzi səbəblərdən, o cümlədən ayrılan vəsaitin bölüşdürülməsi məsələsindəki fikir ayrılıqları üzündən “koalisiya” baş tutmayıb və Anar Məmmədli ilə Xədicə İsmayılın ayrı-ayrılıqda “işləməsi” qərara alınıb.