QHT-lər Ermənistanla bağlı beynəlxalq ictimaiyyətə müraciət edib

Azərbaycanda fəaliyyət göstərən vətəndaş cəmiyyəti təşkilatları beynəlxalq ictimaiyyətə müraciət edib.

Məktubda Ermənistanın dağ-mədən sənayesinin fəaliyyəti nəticəsində yaranan, Yer kürəsinin ekosisteminə regional və qlobal təsir göstərən ekoloji fəlakətə təcili diqqət yetirilməsi tələb olunub.

Müraciətdə Naxçıvanla sərhəd ərazidə Ermənistanın inşa etdiyi metallurgiya zavodu və onun regiona vurduğu zərərlərə xüsusi diqqət çəkilib.

QHT sədri Əyyub Kərimlinin sözlərinə görə, flora və fauna, o cümlədən suyun çirklənməsinə səbəb olan mədən tullantıları Azərbaycanla yanaşı, Xəzər regionuna da gələcəkdə mənfi təsir göstərəcək.

Sənəddə sübutlar və əsaslı faktlar əlavə olunmaqla qeyd olunub ki, Ermənistanın Azərbaycanla sərhəd bölgəsində davam edən mədən əməliyyatları ekosistemin deqradasiyası ilə nəticələnir. Bu, təkcə Ermənistanın ətraf mühiti üçün deyil, həm də qonşu ölkələrə də ciddi təhlükə mənbəyidir.

Müraciətdə həmçinin yaşıl sənayenin qorunması məqsədilə beynəlxalq təşkilatlardan qrant alan Ermənistanın bu maliyyəni regionda təbiətin məhv edilməsi və ekoloji tarazlığın pozulması ilə nəticələnən fəaliyyətlərin icrası üçün yox, təyinatı üzrə istifadə olunması tələb olunur.