“Qonaq gələnlər maşını kənddə qoyub Gorusa erməni nömrəsi olan maşınla, avtobusla gedirdilər”

“Qərbi Azərbaycan Xronikası” layihəsi çərçivəsində "Həyat Hekayəsi" verilişinin növbəti buraxılışı hazırlanıb.

"Dayım rəhmətə gedəndə dedi ki, Niyadar bulağının o soyuq suyundan gətirin içim ölüm" adlı veriliş Zəngəzur mahalının Gorus rayonunun Qurdqalaq kənd sakini Roza Cavadovanın həyat hekayəsinə həsr olunub.

R.Cavadova erməni vəhşiliyindən kövrələrək söz açıb:

"Göyçək nənəm danışırdı ki, 1905-ci illərdə ermənilər kəndimizə hücum etdilər. Onlar kəndimizi yandırıb 13 nəfəri öldürüblər. Cahan xala sənəyi götürüb suya gedəndə görüb ki, ermənilər gəlirlər. Yerə uzanıb başından kəlağayısını çıxarıb üstünə örtüb ki, ermənilər elə bilsinlər ölüb

Ermənilər Cahan xalanın nizə ilə qoluna vurublar, amma o, tərpənməyib, susub, elə biliblər ölüb. Ermənilər çıxıb gedəndən sonra durub gəlib. Erməni həkimlər Yusif müəllimin 10 yaşlı oğlunu əməliyyat zamanı öldürüblər".

Qurdqalaq sakini 1988-ci ildəki deportasiyanın çox acınacaqlı olduğunu söyləyib:

"Anam rəhmətə gedəndə dedi ki, oranın bulağının suyundan gətirin içim. Dayım da rəhmətə gedəndə dedi ki, Niyadar bulağının o soyuq suyundan gətirin içim. Uşaqları dayıma Şollar suyundan gətirdilər. O, bir qurtum içdi və dedi ki, məni aldatmayın, bu, oranın suyu deyil. Çox insanlarımız Vətən həsrəti ilə dünyasını dəyişdilər".