Qrono Azərbaycan və Ermənistan arasındakı münasibətdən danışdı | Sensasiyalı açıqlama

Ermənistan və Azərbaycan arasında nizamlanma prosesinin müxtəlif formatlarda əldə edilmiş nailiyyətlər və uğurlara əsaslanan sakit və müsbət atmosferdə və son zamanlar ikitərəfli səviyyədə davam etməsi Avropa Birliyi üçün çox vacibdir.

Bunu Avropa Birliyinin Cənubi Qafqaz üzrə xüsusi nümayəndəsi Maqdalena Qrono erməni mətbuatına müsahibəsində deyib.

“Bakıda bütün həmsöhbətlərim “münaqişə həll olunub”, “vəziyyət sabitləşib”, “gücdən istifadə etmək niyyəti yoxdur”, “nizamlanma prosesi bütün istiqamətlərdə davam etməlidir” fikrini bildirdilər.

Bir daha qeyd etmək istərdim ki, görüşlər zamanı eşitdiklərim bəzən ictimai yerlərdə eşitdiklərimizdən çox fərqli idi. Yanvarın 16-da planlaşdırıldığı kimi, Ermənistan və Azərbaycan sərhəd komissiyalarının 11-ci iclası keçirilib.

Gələcək demarkasiya işləri ilə bağlı tərəflər arasında davam edən fikir mübadiləsini və şimaldan cənuba konkret demarkasiya işlərinin davam etdirilməsi ilə bağlı əldə olunmuş razılığı alqışlamaq və yüksək qiymətləndirmək istərdim.

Bu, çox müsbət siqnaldır və çox ümid edirəm ki, istər sülh müqaviləsi layihəsi, istər əlaqələrin bərpası və kommunikasiya yollarının açılması, istərsə də humanitar məsələlər kimi digər sahələrdə də oxşar irəliləyişlər olacaq.

Şübhəsiz ki, hər iki tərəfi tərəqqiyə sadiq olmağa çağırırıq və müəyyən xoşagəlməz tendensiyaların mənfi təsirləri barədə xəbərdarlıq edirik”, – M.Qrono bildirib.