"Ermənistan bu ölkələrdən təlimat alır ki..." | Sabiq nazir erməniləri ifşa etdi?

Azərbaycanla Ermənistan arasında sülhə dair əldə edilən razılaşmalarda bir-birinə qarşı olan zərərli təbliğat işlərinə son qoymaq məsələsi də əksini tapıb. Sözsüz ki, bunlar fərqli yanaşmaların nəticəsində ortaya çıxan amillərdir. Bu heç də xalqdan gələn “təşəbbüs” deyil. Belə halların olmasında maraqlı qüvvələr var.

Bu sözləri “Teleqraf”a açıqlamasında sabiq təhsil naziri, professor Firudin Cəlilov deyib.

O bildirib ki, Rusiya, İran və Fransadan verilən təlimatlar əsasında Ermənistan cəmiyyətində Azərbaycana, Türkiyəyə qarşı təbliğat həyata keçirilir:

“Bu cür hallar məhz kənar təsirlərlə körüklənir. Sadə camaatın belə işlərlə məşğul olması ağlına belə gəlmir. İndi sülhə nail olmaq üçün təbliğat məsələlərində diqqətli olunmalıdır. Zamanla bəzi məsələlər həllini tapacaq. Sözsüz ki, xalq olaraq kiminlə qonşu olduğumuzu unutmamalıyıq. Rusiyanın Cənubi Qafqazda olan maraqları fonunda bölgədə təxribatların, pozuculuq hallarının olması istisna edilmir”.

Firudin Cəlilovun fikrincə, xalqlar arasında dostluğu və düşmənçiliyi təbliğ edənlər ilk növbədə alimlər, diplomatlar və siyasətçilərdir:

“Mən erməni alimini qınaya bilmirəm. O yazır ki, Nuh peyğəmbər də erməni idi, “böyük Ermənistan” olub və s. Azərbaycan tarixçiləri, alimləri isə bilərəkdən və ya bilməyərəkdən ermənilərin “dəyirmanına su tökürlər”.

Vaxtilə erməni alimləri Qarabağ mövzusuna aid yüzə qədər kitab yazmışdılar. Azərbaycanda isə bu, barmaqla sayılacaq səviyyədə idi. Ermənilər məhz yazılarla cəmiyyəti bu prosesə hazırlamağa çalışırdılar”.

Professor hesab edir ki, ermənilərə Qafqazda dövlət yaradan Rusiya imperiyası onların ərazilərini genişləndirmək istəyirdi:

“Bu “plan” baş tutmadı. Əsasən “A variantı” məhz bu idi ki, keçmiş Dağlıq Qarabağın ərazisi Ermənistana birləşdirilsin. Amma Azərbaycan bunun qarşısını aldı. Unutmaq olmaz ki, o qüvvələrin “B planı” da var. Ona görə də bundan sonra daha çox diqqətli olmalıyıq”.