"Sputnik" və BBC-nin Azərbaycan nümayəndəlikləri bağlanır?

“Azərbaycan mövcud uyğunsuzluğun aradan qaldırılması üçün xarici KİV-in ölkəmizdəki nümayəndəlik və filiallarının faktiki fəaliyyətinə müəyyən düzəlişlər etmək qərarına gəlib”.

Bu barədə Caliber.Az-ın redaksiyasına etibarlı mənbələrdən daxil olan eksklüziv məlumatda bildirilib.

Qeyd olunub ki, bu düzəlişlər əsasən “Rossiya seqodnya” beynəlxalq informasiya agentliyinin ölkəmizdə filialı kimi fəaliyyət göstərən “Sputnik Azərbaycan” onlayn xəbər portalını, eləcə də “BBC” və “BBC News Azərbaycanca” media qurumlarını əhatə edəcək.

“Mövcud uyğunsuzluğun aradan qaldırılması üçün Azərbaycan və Rusiyanın dövlət xəbər agentliklərinin Rusiya və Azərbaycan təmsilçiliyində, məsələn, AZƏRTAC-ın Rusiyada nə qədər müxbiri işləyirsə, müvafiq olaraq eyni sayda da “Rossiya seqodnya”nın ölkəmizdə müxbiri fəaliyyət göstərəcək. Hazırda söhbət bir tam ştatlı vəzifədən gedir”, – deyə yazıda bildirilib.

Qeyd edək ki, “Rossiya seqodnya”nın Bakı ofisinin işinə 40-a yaxın adam cəlb olunub. Filialın özünün isə ləğv edilməsi gözlənilir – “Rossiya seqodnya” Azərbaycanda işini bir müxbirlə davam etdirəcək və onun fəaliyyəti Azərbaycan Respublikasının qanunvericiliyinə və Rusiya Federasiyası və Azərbaycan Respublikası hökumətləri arasında KİV müxbirlərinin statusu haqqında 9 yanvar 2001-ci il tarixli sazişə uyğun olaraq tənzimlənəcək.