Rusiya cinayət işinə xitam verir? - Baku TV

“Aktau yaxınlığında qəzaya uğrayan AZAL təyyarəsi əlverişsiz hava şəraiti səbəbindən Rusiya ərazisində eniş edə bilməyib. Bu əsasla da Rusiya İstintaq Komitəsi cinayət işinə xitam vermək qərarına gəlib”.

Bu barədə anonim istifadəçi tərəfindən “BT News” “Telegram” kanalına göndərilən sənəddə bildirilir.

Sənədin, əslində, Rusiya İstintaq Komitəsi tərəfindən Azərbaycan Baş Prokurorluğuna ünvanlanan məktub olduğu iddia edilir.

Məktubun məzmunu faciəyə görə məsuliyyətdən yayınmaq cəhdi kimi görünür və məntiqi bir sual doğurur: Rusiya İstintaq Komitəsi, əslində, günahı “hava şəraiti”nin üzərinə yıxırsa, o zaman hansı əsasla cinayət işinə xitam verir? Niyə görə onlarla insanın ölümünə görə məsuliyyət daşıyanlar cəzasız qalmalıdır? Axı faciəyə görə məsuliyyət daşıyan Rusiya tərəfidir.

AZAL təyyarəsi “Pantsir-S1” hava hücumundan müdafiə raketi ilə vurulub və sonradan Aktau hava limanı yaxınlığında qəzaya uğrayıb.

Bu sənədin məzmunu Vladimir Putinin oktyabrın 9-da Düşənbədə MDB Dövlət Başçıları Şurasının iclası çərçivəsində səsləndirdiyi rəsmi mövqe ilə birbaşa ziddiyyət təşkil edir. Həmin vaxt V.Putin AZAL mülki təyyarəsinin Rusiya Silahlı Qüvvələrinin Hava Hücumundan Müdafiə sistemlərinin işi nəticəsində qəzaya uğradığını etiraf etmiş və bu cür vəziyyətlərdə nə lazımdırsa, onu etməyə hazır olduğunu bildirib.

Lakin “nə lazımdırsa”, ilk növbədə, günahkarların müəyyən edilməsi və onların məsuliyyətə cəlb edilməsi deməkdir. Cinayət işinə xitam verilməsi isə açıq şəkildə bu yanaşmaya uyğun gəlmir.

Qeyd edək ki, bu sənədin həqiqi olub-olmaması müəyyən edilməyib.