Separatçılar Paşinyandan xəbərsiz iclas keçirdi

Qarabağdan qovulmuş separatçı tör-töküntünün qondarma “parlamenti” İrəvanda qapalı iclas keçirib.

Erməni mətbuatının məlumatına görə, bu, separatçıların təslim olmasından sonra keçirdikləri ilk iclas olub. Keçmiş qondarma rejimin İrəvandakı nümayəndəliyində keçirilən iclasda Bakıda həbsdə olan Davit İşxanyandan başqa bütün “deputatlar” iştirak edib.

Məlumata görə, separatçılar Qarabağ məsələsi üzrə beynəlxalq komitə yaradıblar. Qərara alınıb ki, “komitə” beynəlxalq platformalarda Qarabağ məsələsini qaldırsın və bölgəyə qayıdış planı ilə məşğul olsun.

Qəzet yazır ki, separatçıların İrəvanda səssiz toplanması və bu barədə mətbuata məlumat verilməməsi Ermənistan hakimiyyətini qıcıqlandırmamaq məqsədi daşıyır. Çünki Paşinyan hakimiyyəti qondarma qurumların saxlanmasının əleyhinədir. Elə ermənilərin özləri də bu təşəbbüsü dəstəkləmir.

Bu faktları nəzərə alan “deputat”ların istəkləri guya dünyaya səslənmək olsa da, onlar qorxularından mikrofonlarını söndürüb, məsələni aralarında müzakirə etməklə kifayətləniblər.