Serbiyalı nazirdən mühüm mesaj | "Azərbaycan Serbiya üçün sadəcə qaz tədarükçüsü deyil" - Baku TV

"Serbiya ilə Azərbaycan yaxın perspektivdə enerji daşıyıcılarının tədarükü, eləcə də birgə infrastruktur təşəbbüslərinin həyata keçirilməsi məsələlərinə dair danışıqları davam etdirir".

Bu barədə Serbiyanın mədən və energetika naziri Dubravka Djedoviç Handanoviç Azərbaycana səfərinin yekunlarına dair sosial şəbəkə səhifələrində məlumat verib.

D.Djedoviç Handanoviç Azərbaycanın maliyyə naziri Sahil Babayevlə iki dövlət arasında kompleks qarşılıqlı fəaliyyət barədə danışıqlar apardığını bildirərək, enerji resurslarının ikitərəfli ticarət dövriyyəsinin əsasını təşkil etdiyini xüsusi vurğulayıb.

D.Djedoviç Handanoviç qeyd edib ki, növbəti ay iki ölkə arasında birbaşa hava əlaqəsi açılacaq, həmçinin ən yüksək səviyyədə bir sıra səfərlər baş tutacaq. Onun sözlərinə görə, Azərbaycan Serbiya üçün sadəcə qaz tədarükçüsü deyil, həm də strateji tərəfdaşdır.

İqtisadiyyat naziri Mikayıl Cabbarov və Azərbaycan Dövlət Neft Şirkətinin rəhbəri ilə görüşlər çərçivəsində Serbiyanın enerji landşaftını transformasiya etmək iqtidarında olan, Niş şəhəri yaxınlığında qaz elektrik stansiyasının inşası üzrə layihənin həyata keçirilməsinin konkret mərhələləri nəzərdən keçirilib.

"Biz elektrik və istilik enerjisi istehsalı obyektinin inşası müddətlərini müzakirə etdik. Bu layihə əsası iki ölkənin prezidentləri tərəfindən qoyulmuş tərəfdaşlığı gücləndirir", – deyə o qeyd edib.