Sərhəddəki təxribatların əsl səbəbi | Tofiq Zülfüqarov ermənilərin planından danışdı

Rusiyanın Ermənistandakı səfiri Sergey Kopirkin Ermənistan-Azərbaycan sərhədində işləyən Avropa Birliyinin Ermənistandakı missiyasının monitorinq adı altında Rusiya, Azərbaycan və İrana qarşı mübarizə aparmaq üçün kəşfiyyat məlumatlarının toplanması ilə məşğul olduğunu bildirib.

Həmçinin son günlərdə Ermənistan sərhəddə bir neçə dəfə təxribat törədib. Belə ki, Ermənistan silahlı qüvvələrinin bölmələri Ordumuzun Kəlbəcər rayonu və Naxçıvanda yerləşən mövqelərini atıcı silahlardan atəşə tutub.

Sabiq xarici işlər naziri Tofiq Zülfüqarov Unikal-a açıqlamasında ermənilərin məqsədini anlamağın çətin olduğunu bildirib.

“Vizual şəkildə hansı kəşfiyyat məlumatını toplamaq olar, bu da sual altındadır. Əminəm ki, kəşfiyyat məlumatları onlara Fransa tərəfindən ötürülür. Onlar bu məlumatları müxtəlif müasir üsullar və avadanlıqlarla toplayırlar.

Ermənilər Fransa Prezidenti Emmanuel Makronun ölkələrinə səfəri olacağını planlaşdırırlar. Son günlərdə sərhəddə təxribatlar törətmələri də məhz bununla bağlıdır.

Ermənilər göstərmək istəyirlər ki, guya, onlar üçün təhlükə var. Bu barədə hansısa bəyanatların və vədlərin verilməsini istəyirlər. Yəni həmişəki kimi ermənilər təxribat xarakterli siyasət yürüdürlər və köhnə üsullarından istifadə edirlər”, – deyə o qeyd edib.