Sinan Oğandan Azərbaycana söz atan jurnalistə cavab

Türkiyəli jurnalist, 2009-cu ildə Azərbaycanın Qarabağ bölgəsinə qeyri-qanuni səfər edən və buna görə ölkəmizdə “arzuolunmaz şəxslər” siyahısına daxil edilən Nagehan Alçı bu dəfə qərəzli, böhtan açıqlamaları ilə gündəmə gəlib.

Jurnalist Türkiyədə keçirilən prezident seçkisinin ikinci turunda Rəcəb Tayyib Ərdoğanı dəstəkləyən Sinan Oğanı ittiham edib. O, “Twitter” hesabında yazdığı statusda Sinan Oğanın etnik kimliyini mübahisələndirib. Eyni zamanda Azərbaycan Prezidentinin ünvanına həqiqətə uyğun olmayan fikirlər yazıb.

Türkiyənin ATA İttifaqının prezidentliyə namizədi Sinan Oğan özünün “Twitter” hesabında Nagehan Alçının böhtanlarına cavab verib: “Nagehan xanım, siz də hamı kimi mənim keçmişimlə bağlı qınamağa bir şey tapa bilməyəndə öz təxəyyülünüzü satmağa başladınız? Sizcə, biz bilmirik ki, sizin məqsədiniz Azərbaycan Prezidentinin Türkiyədə daxili siyasətə qarışdığını iddia etmək və Türkiyədə anti-Azərbaycan cəbhəsi yaratmaqdır?! Deyəsən, Azərbaycana giriş qadağanızın olmasının acısı keçməyib!”, – deyə prezidentliyə namizəd sosial şəbəkə hesabında yazıb.

Etnik kimliklə bağlı məsələyə gəlincə, Sinan Oğan digər tvitində bildirib ki, “Azəri” deyə bir soykökü yoxdur. “Oğuz türkləri, Azərbaycan türkləri və s. kimi türk boyları var. Mən sizin mənşəyinizi bilmirəm, mənə maraqlı da deyil. Nagehan xanım, mən türkəm. Heç kimin etnik kimliyinə isə əhəmiyyət verməmişəm. Ancaq mən sizin soykökü məsələsini vurğulayaraq bu irqçi münasibətinizi qınayıram və bunu yersiz hesab edirəm”, – deyə Sinan Oğan jurnalistə cavabında bildirib.