Şuşada olduğuma görə xoşbəxtəm | ABŞ səfirindən Şuşa səfəri ilə bağlı paylaşım

ABŞ-nin Azərbaycandakı səfiri Mark Libbi Azərbaycan Prezidentinin Şuşa rayonu üzrə xüsusi nümayəndəsi Aydın Kərimov ilə görüşüb.

Bu barədə səfirliyin "X"dəki hesabında paylaşım edilib.

“Səfir M.Libbi Şuşada şəhərin inkişafı istiqamətində görülən işlər və məcburi köçkünlərin qayıdışı ilə bağlı ətraflı məlumat almaq üçün xüsusi nümayəndə Aydın Kərimovla görüşüb.

Onlar həmçinin regionun “yaşıl enerji”sini və ABŞ-nin Azərbaycanın məcburi köçkün icmalarına və minalardan təmizləmə təşəbbüslərinə göstərdiyi dəstəyi müzakirə ediblər”, – deyə paylaşımda qeyd edilib.

Səfir eyni zamanda Şuşaya səfəri ilə bağlı təəssüratlarını da bölüşüb:

“Şuşada olduğuma görə xoşbəxtəm. Biz iki aya yaxındır ki, bu səfərə hazırlaşırdıq və şadam ki, səfər, nəhayət baş tutdu. Qonaqpərvərliyinizə görə təşəkkür edirəm. Azərbaycanın bütün bölgələrinə səfərlərimi davam etdirməyi səbirsizliklə gözləyirəm”.