“Tramp yolu” üzrə inşa olunacaq xətlər bundan daha sərfəli olacaq” | Meliksetyan

“Coğrafi və iqtisadi amillər Cənubi Qafqazda nəqliyyat-kommunikasiya xətlərinin bərpasında həlledici rol oynayacaq”.

Bu fikri erməni politoloq Samvel Meliksetyan səsləndirib.

O bildirib ki, Cənubi Qafqazda kommunikasiya xətlərinin bərpası zamanı sanki arada siyasi sərhədlər yoxdurmuş kimi düşünmək vacibdir:

“Əgər siyasi sərhədlər olmasaydı, ən əlverişli və optimal yolları seçərdik. Nəzərə almaq lazımdır ki, Cənubi Qafqaz kiçik region deyil – burada üç ölkədən başqa Azərbaycanın Naxçıvan anklavı da mövcuddur. Buna görə də qarşılıqlı əlaqələr mürəkkəb coğrafi şəraitlə bağlıdır”.

Ekspertin sözlərinə görə, son 30 ildə regionda baş verən münaqişələr bölgədən keçən nəqliyyat marşrutlarına mənfi təsir göstərib:

“Bu, yalnız Qarabağ deyil, həm də Abxaziya konflikti ilə bağlıdır ki, onun nəticəsində Rusiya-Gürcüstan-Ermənistan dəmir yolu bağlanıb. Eləcə də Ermənistanla Azərbaycan arasında bütün əlaqə xətlərinin kəsilməsi regiondakı kommunikasiya sisteminin ümumi tənəzzülünə səbəb olub”.

Meliksetyan qeyd edib ki, “Tramp yolu” adlı yeni layihə Azərbaycanın əsas hissəsi ilə Naxçıvanın birləşməsini nəzərdə tutur: “Bu məsələ Azərbaycan üçün həmişə önəmli olub, indi də müzakirələrdə bu aspekt ön plandadır”.

Ekspert iddia edib ki, “Tramp yolu” üzrə inşa olunacaq xətlər Bakı-Tbilisi-Qars dəmir yolundan daha səmərəli olacaq.