Transformatorların birgə istehsalı planlaşdırılıb | Qazaxıstan Prezidenti

“İkitərəfli əməkdaşlığın inkişafı üzrə kompleks proqram plana uyğun icra olunur”.

Bu sözləri Qazaxıstan Prezidenti Kasım-Jomart Tokayev Azərbaycan Prezidenti İlham Əliyevlə mətbuata birgə bəyanatında deyib.

Onun sözlərinə görə, danışıqlar zamanı iqtisadi-ticari əlaqələrin genişləndirilməsi məsələsinə xüsusi diqqət yetirilib və tərəflər yaxın gələcəkdə əmtəə dövriyyəsini ikiqat artıraraq 1 milyard dollara çatdırmaq barədə razılığa gəliblər.

Tokayev qeyd edib ki, kənd təsərrüfatı, energetika, emal sənayesi, inşaat sektoru və rəqəmsallaşma sahələrində böyük imkanlar mövcuddur.

O həmçinin transformatorların birgə istehsalının planlaşdırıldığını, mənzil və infrastruktur obyektlərinin tikintisinin aparıldığını, gəmiqayırma sahəsində birgə layihələrin hazırlanmaqda olduğunu diqqətə çatdırıb:

“Hökumətlərə bu istiqamətləri nəzarətdə saxlamaq və sənaye əməkdaşlığının inkişafı üzrə yol xəritəsinin qısa müddətdə qəbul olunması tapşırılıb. Bundan əlavə, Qazaxıstan-Azərbaycan birbaşa investisiyalar fondunun fəaliyyətinin aktivləşdirilməsi qərara alınıb”.

Tokayev əlavə edib ki, iki ölkənin işgüzar dairələri arasında təmasların genişləndirilməsi vacibdir və bu baxımdan Qazaxıstan-Azərbaycan biznes-forumu xüsusi əhəmiyyət kəsb edir.