Xaçatryan Qarabağdan danışdı | Əlimizdən gələni edəcəyik

“Ermənistan hakimiyyəti Qarabağ məsələsinə hələ dəfələrlə toxunacaq”.

Bunu dekabrın 20-də jurnalistlərlə söhbətində hakim “Mülki müqavilə” partiyasından olan deputat, parlamentin müdafiə və təhlükəsizlik məsələləri üzrə daimi komissiyasının sədr müavini Armen Xaçatryan deyib.

Bildirib ki, Qarabağ məsələsi bu gün də hökumətin bütün iclaslarında müzakirə olunur. İki ölkə arasında imzalanması gözlənilən sülh müqaviləsi məsələsinə toxunan Xaçatryan əlavə edib ki, hazırda texniki məsələlərin, xəritələrin, topoqrafik məlumatların təhlili üzərində iş gedir.

Son zamanlar Ermənistanda tüğyan edən anti-Rusiya mövqeyinə də münasibət bildirən deputat vurğulayıb ki, bu tipli açıqlamaların hökm sürməsinə baxmayaraq, bütün sahələrdə Ermənistan-Rusiya münasibətlərinin səviyyəsinin yüksəldilməsi üzərində çalışılır.

O əlavə edib ki, Ermənistanla Rusiyanı bir birinə bağlayan iqtisadi və digər əlaqələr var.

“Biz əlaqələri qoruyub, saxlamaq üçün əlimizdən gələni edəcəyik. Lakin, rəsmi Moskva bilməlidir ki, Ermənistanla bağlı üzərinə götürdüyü müqavilə öhdəlikləri yerinə yetirilməlidir”, – deyə Armen Xaçatryan fikrini tamamlayıb.

Bundan başqa, deputat ölkənin silahlanması ilə bağlı suala da cavab verib.

“Son bir ildə beynəlxalq aləmin Ermənistana münasibəti dəyişib. Qərb dövlətləri heç vaxt düşünə bilməzdilər ki, nə vaxtsa MDB-nin, KTMT-nin bir hissəsi olan Ermənistana silah verəcəklər, hətta satacaqlar.

Amma bizim bu imkanlarımız var, onları əldə edirik. Yəni hər şey edilir ki, Ermənistanla Azərbaycanın üstünlüyü, hərbi üstünlüyü balanslaşdırılsın”, – deyə Armen Xaçatryan jurnalistlərlə söhbətini yekunlaşdırıb.