Xarici diplomatlar azad edilmiş ərazilərdə - Baku TV

Sentyabrın 11-də Azərbaycan Respublikası Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyevin müşayiəti ilə Azərbaycanda akkreditə olunmuş diplomatik korpusun nümayəndələrinin Qarabağ və Şərqi Zəngəzura 2 günlük səfəri başlayıb.

58 ölkədən və 9 beynəlxalq təşkilatdan ümumilikdə 150 nəfərin iştirak etdiyi səfər çərçivəsində nümayəndələr Şuşanın rəmzlərindən biri olan Cıdır düzündə olublar.

Bu, diplomatik korpus nümayəndələrinin torpaqlarımız işğaldan azad edildikdən sonra Qarabağ və Şərqi Zəngəzura 22-ci səfəridir.

Səfirlər Qarabağda inkişafın sürətlə irəlilədiyini, Azərbaycanın gördüyü işlərin təəccüb doğurduğunu vurğulayıblar. Onlar əvvəlki səfərlərlə müqayisədə küçələrdə, abidələrdə və digər ərazilərdə böyük dəyişikliklər gördüklərini bildiriblər.

Nümayəndələr səhər saatlarında Xankəndini də ziyarət edib, Qarabağ Universiteti, Xankəndi tikiş fabriki və digər obyektlərlə tanış olublar.

Səfərin növbəti mərhələsi sentyabrın 12-də Ağdərə və Kəlbəcərdə aparılan quruculuq işləri ilə tanışlığa həsr olunacaq.