Xocalı soyqırımı ilə bağlı paylaşımlar | Faciə qurbanlarının xatirəsi yad edildi

26 fevral Xocalı soyqrımının 33-cü ildönümüdür. Bu günlə bağlı dünya ölkələri Azərbaycana başsağlığı verib.

İlk paylaşım qardaş Türkiyədən gəlib. "Xocalı soyqırımının 33-cü ildönümündə qətlə yetirilən azərbaycanlı qardaşlarımızı rəhmətlə yad edirəm. Yaxşı və pis gündə bir olduğumuz qardaş Azərbaycan xalqına başsağlığı verirəm", ‒ deyə Türkiyə Prezidenti Rəcəb Tayyib Ərdoğan "X" hesabında yazıb.

"Baykar" şirkətinin texniki direktoru Səlcuq Bayraktar da Xocalı qətliamı ilə bağlı sosial şəbəkə hesabında paylaşım edib. "İllər keçsə də, Xocalı faciəsinin acısı qəlbimizdə təzədir", ‒ deyə o qeyd edib.

Türkiyənin Xarici İşlər Nazirliyi də faciə qurbanlarını yad edib. "33 il əvvəl Xocalıda qətlə yetirilən günahsız azərbaycanlı bacı-qardaşlarımızın əziz xatirəsini rəhmət və hörmətlə anır, Can Azərbaycanın kədərini qəlbimizdə daşıyırıq", ‒ deyə qeyd olunub.

Bundan başqa, Böyük Britaniya, Fransa və Pakistanın ölkəmizdəki səfirlikləri də Xocalı faciəsinin ildönümü ilə bağlı başsağlığı verib. Bu barədə səfirliklərin sosial şəbəkə hesablarında paylaşım edilib. Fransa və Böyük Britaniya səfirləri şəhidlərimizə rəhmət diləyib. Pakistan səfirliyinin paylaşımında iki ölkənin bir-biri ilə həmrəy olduğu vurğulanıb.

Almaniyanın ölkəmizdəki səfiri Ralf Horlemann da Xocalı soyqırımı ilə bağlı paylaşım edib. "33 il əvvəl Xocalıda həyatlarını itirənlərin xatirəsini ehtiramla yad edirik", ‒ deyə diplomat bildirib.

Bizi unutmayanların arasında İsrailin Azərbaycandakı səfirliyi də olub. "Bu gün biz 1992-ci il Xocalı faciəsində həlak olanların xatirəsini ehtiramla yad edirik. İsrail adından Azərbaycan xalqına başsağlığı verirəm. Bu cür faciələr bizə nifrət və ədalətsizliyə qarşı birləşərək ümumi insanlığımızı müdafiə etməyə dair borcumuzu xatırladır", ‒ deyə yazıda qeyd olunub.