Yaxın Şərq də ABŞ-yə baş qaldırır?

Donald Trampın ABŞ Ordusuna husilərə qarşı əməliyyata başlamaq əmrindən sonra Yaxın Şərqdə vəziyyət xeyli qarışıb.

Əslində, gözlənilən o idi ki, husilər D.Trampın bu əmrindən çəkinib bölgədə bir qədər ehtiyatlı siyasət yürüdəcəklər.

Lakin son yaşananlar bunun tam əksini göstərir. Husilərin İsraildəki Ben-Qurion Hava Limanına və Nevatim Hava Bazasına hücumları onların hərbi imkanlarının və cəsarətlərinin artdığını nümayiş etdirir.

ABŞ və husilər arasında gərginliyin artması isə hər iki tərəfin qarşılıqlı hücumları ilə müşayiət olunur. Husilər ABŞ-yə məxsus hərbi gəmilərə hücumlar təşkil edərək Qırmızı dənizdə təhlükəsizliyi təhdid edirlər.

Bu hücumlar ABŞ-nin regiondakı maraqlarına birbaşa təhdiddir. Buna görə də Birləşmiş Ştatlar husilərin hücumlarına cavab olaraq Yəməndəki hədəflərə hava zərbələri endirir.

Bu qarşıdurmaların davam etməsi regionda humanitar vəziyyətin daha da pisləşməsinə, mülki itkilərin artmasına və siyasi həll yollarının daha da çətinləşməsinə gətirib çıxara bilər.

Ekspertlər düşünürlər ki, yaxın günlərdə ABŞ və husilər arasında gərginliyin daha da artması ehtimalı yüksəkdir.

Bölgədə yaranmış bu qarışıq vəziyyət bir sualı aktuallaşdırır. Husiləri bu cür addımlar atmağa həvəsləndirənlər kimlərdir?