Yeni təxribata çalışan ermənilərə Qriqoryan belə "dərs verdi"

Ermənistanda yaradılan qondarma Qarabağ məsələləri komitəsinin koordinatoru, ölkənin sabiq xarici işlər naziri Vardan Oskanyan və “qurumun” bir sıra üzvləri müxtəlif yollara əl atmaqla Azərbaycana təzyiq etməyə çalışıblar.

Yerli KİV-in yaydığı məlumata görə, sözügedən qondarma qurumun üzvləri Ermənistan Təhlükəsizlik Şurasının katibi Armen Qriqoryanla görüşüblər. Onlar katibin dəstəyini ala biləcəklərinə ümid etsələr də, istəklərinə nail olmayıblar.

Məlumata görə, həmin şəxslər görüşdən əvvəl iki mümkün variantı müzakirə ediblər. Birinci variant Ermənistan Təhlükəsizlik Şurasının katibi Armen Qriqoryanla, digər variant isə xarici işlər naziri Ararat Mirzoyanla görüşmək olub. Müzakirələrdən sonra onlar əslən Qarabağdan olan A.Qriqoryanla görüşə üstünlük veriblər. Lakin katibin iştirakı ilə keçirilən iclas həddindən artıq soyuq keçib. Armen Qriqoryan onların çıxışını yarıda kəsərək açıq şəkildə bildirib ki, Qarabağ məsələsi artıq bitib. Ermənistan hökuməti bu məsələnin gələcəyi üçün qarşıda heç nə görmür.

Qeyd edək ki, Ermənistanda radikal-revanşist qüvvələrin yaratdıqları “Qarabağ məsələləri komitəsi” ölkənin sabiq xarici işlər naziri Vardan Oskanyanın rəhbərliyi ilə yanvarda fəaliyyətə başlayıb.