Çıxış yolunu süni intellektdə axtaran gənclər | Alimləri narahat edən səbəblər

“Microsoft” texnoloji korporasiyası və Karnegi Mellon Universitetinin amerikalı alimləri narahatedici tendensiya aşkar ediblər. Onların gəldikləri qənaətə görə, generativ süni intellektin aktiv istifadəsi tənqidi düşüncəni və müstəqil problem həlli bacarıqlarını zəiflədə bilər. Tədqiqat “Microsoft”un rəsmi saytında dərc edilib.

Əldə edilən məlumatlar biznes, təhsil və İT sahələrində çalışan 319 intellektual işçinin sorğu nəticələrinə əsaslanır.

Araşdırmalar göstərib ki, süni intellekt alətlərindən istifadə halları zamanı 40 %-də iştirakçılar tənqidi təhlil etmədən tamamilə neyron şəbəkənin nəticələrinə güvəniblər. Bu tendensiya xüsusilə rutin tapşırıqlar yerinə yetirərkən daha aydın şəkildə müşahidə edilib, burada istifadəçilər öz mülahizələri əvəzinə süni intellektə kor-koranə etibar etməyə üstünlük veriblər.

Alimləri ən çox gənc nəsillə bağlı vəziyyət narahat edir. Məsələn, tələbələr esse yazmaq üçün süni intellektdən aktiv istifadə edərək müstəqil təhlildən yayınırlar. Onlar arasında neyron şəbəkələrdən asılılıq formalaşır ki, bu da “Google effekti” adlanan, hər cür kiçik səbəbə görə axtarış sistemlərindən istifadə etmək vərdişinə bənzəyir.

Tədqiqatçılar süni intellektdən istifadədə şüurlu yanaşmanın, avtomatlaşdırma və müstəqil qərar vermə arasında balansın qorunmasının, tənqidi düşüncə praktikasının və təhsil proseslərinə diqqətlə yanaşmağın zəruriliyini vurğulayıblar.