Qazaxıstanda yeni superkompüter istifadəyə veriləcək

Qazaxıstanda tətbiq olunan süni intellekt sistemi insultdan ölüm hallarını 40 faiz azaldıb.

Bu barədə ölkənin Baş nazirinin müavini, rəqəmsal inkişaf naziri Jaslan Madiyev hökumətin iclasında məlumat verib.

Bildirilib ki, “Cerebra” süni intellekt sistemi kompüter tomoqrafiyası nəticələrini qısa müddətdə təhlil edərək insult diaqnozunun sürətini və dəqiqliyini artırır.

Sistem paytaxt Astana şəhəri ilə yanaşı, bir sıra vilayətlərdə də tətbiq olunur. 2025-ci il sentyabrın 1-dən etibarən 7600-dən çox xəstənin məlumatları təhlil edilib, nəticədə ölüm halları 40 faiz azalıb, vaxtında müalicə alanların sayı isə əhəmiyyətli dərəcədə artıb.

Bundan başqa bu ilin noyabrında Qazaxıstanın Kosşı şəhərində hazırda Almatıda fəaliyyət göstərən analoqundan daha çox gücə malik yeni superkompüter istifadəyə veriləcək.

Bu barədə məlumatların emalı üzrə yeni mərkəzlərin inşasına dair hökumət müşavirəsində məruzə edən “Kazaxtelekom” SC İdarə Heyətinin sədri Bağdat Musin bildirib.

“Kazaxtelekom” ölkənin ən böyük data mərkəzi şəbəkəsini idarə edir, onun 25 MVt gücündə 1700-dən çox server məntəqəsi var.