"WhatsApp"la göndərilən viruslar barədə həyəcan təbili | Hücumlardan necə qorunaq?

"WhatsApp" messencerində "virusa yoluxma" əvvəllər linkə keçid etmək və ya fayl yükləmək yolu ilə baş verirdi. Yeni virus isə telefona avtomatik olaraq daxil ola bilər.

Rusiyada kibertəhdidlərin araşdırılması mərkəzinin texniki direktoru Aleksey Vişnyakov məlumat verib ki, bunun üçün potensial qurbanın telefon nömrəsini bilmək kifayətdir.

"Zərərli proqram avtomatik yüklənən PDF faylları vasitəsilə ötürülür. Buna görə cihazı qorumaq üçün parametrlərdə sənədlərin avtoyüklənməsini söndürmək lazımdır", − deyə o bildirib.

Ekspert bildirib ki, adi smartfon istifadəçisinin "zero-click" hücumu (virusun linklərə keçid etmədən, fayl yükləmədən və ya cihaza yükləndiyi hal) nəticəsində yoluxmanı aşkar etməsi asan deyil.

"Lakin hücumçuların səhvləri zərərli kodun varlığını aşkar etməyə imkan verir. Məsələn, eksploitin sistemin və ya messencerin versiyası ilə uyğunsuzluğu zamanı istifadəçi cihazla qarşılıqlı əlaqədə olarkən əvvəllər işləyən tətbiqin açılmaması, smartfonun ekran toxunuşlarına daha yavaş reaksiya verməsi, "Parametrlər" menyusunun bəzi bölmələrinin açılmaması, tətbiqlər menyusunda formaların, simvolların dəyişdirilməsi, ya da tipik görünüşə malik olması kimi anomaliyalarla rastlaşa bilər. Bundan başqa, smartfon vaxtaşırı istifadəçiyə tanış olmayan proqrama əlavə icazələr vermək üçün sorğular göstərə bilər", − deyə mütəxəssis izah edib.

Çox vaxt "zero-click" hücumlarındakı zərərli kod hakerlərin smartfonlarda daimi mövcudluğunu təmin etmir və cihazın sadəcə yenidən yüklənməsi zərərli koddan xilas olmağa imkan verir. Bəzi hücum ssenarilərində isə sistemi zavod parametrlərinə sıfırlamaqla bərpa etmək mümkündür.