Robotlar da "üsyan" edir? - Təqdimat vaxtı qorxulu anlar yaşandı

Çinin "Unitree" texnologiya şirkəti tərəfindən hazırlanan insanabənzər robot anidən hərəkətə başlayıb "H1" adlı robot ictimai təqdimat zamanı gözlənilməz davranışlar sərgiləyərək mühəndisləri çaşbaş salıb.

Belə ki, tanıtım tədbirində robot qəfildən nizamsız və idarəolunmaz şəkildə hərəkət edib. Hadisə anını əks etdirən görüntülər sosial mediada geniş yayılıb və "Maşınların üsyanı başlayıb?" sualını gündəmə gətirib.

Lakin "Unitree" rəsmiləri hadisənin arxasında süni intellektin sərbəst qərar verməsi və ya texnoloji üsyan olmadığını açıqlayıblar. Problem robotun balans sistemini pozan təhlükəsizlik kabelinin düzgün qoşulmaması ilə bağlı olub.

Şirkətin verdiyi məlumata görə, "H1" prototipi yüksək həssaslığa malik stabilləşdirmə sistemi ilə təchiz olunub və millisaniyələr içində mövqe dəyişikliklərinə reaksiya vermək qabiliyyətinə malikdir.

Təqdimat zamanı isə robotun baş nahiyəsinə bağlanan təhlükəsizlik kabeli onun balans alqoritmi ilə uyğun gəlməyərək proqramda "kritik balanssızlıq" siqnalının yaranmasına səbəb olub. Qısamüddətli xaos mühəndislərin təcili dayandırma düyməsini sıxaraq robota enerji verilişini kəsməsi ilə sona çatıb.