Sərxoş sürücü tuneldə qəza törədib, 1 nəfər yaralanıb

Nərimanov rayonunda baş verən ağır yol-nəqliyyat hadisəsi zamanı 1 nəfər xəsarət alıb.

Qəza Heydər Əliyev prospektində qeydə alınıb.

Naxçıvan şəhər sakini Təbriz Cəfərli idarə etdiyi “90-VH-161” dövlət qeydiyyat nişanlı “Volkswagen” markalı avtomobillə prospektdə hərəkətdə olarkən idarəetməni itirib.

Nəticədə avtomobil “Bağırov körpüsü” kimi tanınan tunelin arakəsmə dirəyinə çırpılıb.

Hadisə zamanı avtomobildə olan sərnişin, 1990-cı il təvəllüdlü İbrahimov Kənan Şakir oğlu xəsarət alıb.

Yaralı 1 saylı Şəhər Klinik Xəstəxanasına yerləşdirilib. Ona bədənin küt travması, qapalı kəllə-beyin travması, ayaqların və üzün əzilmiş yarası diaqnozu qoyulub.

Qəza nəticəsində avtomobil deformasiyaya uğrayıb.

Əraziyə Nərimanov Rayon Polis İdarəsinin və DYP, eləcə də Fövqəladə Hallar Nazirliyinin Xüsusi Riskli Xilasetmə Xidmətinin əməkdaşları cəlb edilib.

Məlumata görə, Təbriz Cəfərli avtomobili sərxoş vəziyyətdə idarə edib. Sürücü saxlanılaraq Alkoqol Sərxoşluğunun Yoxlanılma Məntəqəsinə aparılıb.

Faktla bağlı araşdırma aparılır.

Kamil Əmirli

Elşad Mətləboğlu

Baku TV