18 Oktyabr - Azərbaycanda Müstəqilliyin Bərpası Günüdür

Bu il Azərbaycanın müstəqilliyinin bərpa edilməsinin 32-ci ili tamam olur.

1991-ci il oktyabrın 18-də Ali Sovet “Azərbaycan Respublikasının Dövlət Müstəqilliyi haqqında” konstitusiya aktını qəbul edib.

Azərbaycan xalqı ötən əsrin əvvəlində Müstəqil Respublika qurub. 1991-ci ildə isə Azərbaycan Xalq Cümhuriyyətinin varisi kimi müstəqilliyini bərpa edib.

Azərbaycan Parlamentinin 15 oktyabr 2021-ci ildəki plenar iclasında Müstəqillik Günü haqqında yeni qanun qəbul edilib. Elə həmin gün də Prezident İlham Əliyev tərəfindən Müstəqillik Günü haqqında Qanun təsdiqlənib. Bu sənədlə 18 oktyabr Dövlət Müstəqilliyinin adı dəyişdirilərək Müstəqilliyin Bərpası Günü elan edilib.

Bu il ölkəmizdə Müstəqilliyin Bərpası Günü tamam başqa ab-havada qeyd edilir. Azərbaycanın bütün ərazilərində Konstitusiya quruluşu bərpa edilib. Hazırda Qarabağın hər nöqtəsində üçrəngli şanlı bayrağımız dalğalanır. Azərbaycan bu gün müstəqil dövlət kimi xarici siyasətini özü müəyyən edir və mötəbər tribunalarda müsbət mənada ölkəmizin adı çəkilir.