198 saat sonra... | FHN əməkdaşları zəlzələdə xilas etdikləri Türkiyə sakinlərindən danışdı

2023-cü ilin 6 fevralında qardaş ölkə Türkiyədə “Əsrin fəlakəti” baş verdi. Həm Türkiyə, həm də Azərbaycan səhərini faciə ilə açdı. Bir neçə saat ara ilə sadəcə 105 saniyə davam edən iki zəlzələ nəticəsində 53 537 nəfər həlak oldu, 107 213 nəfər isə müxtəlif xəsarətlər aldı.

Xəbəri eşidər-eşitməz Prezident İlham Əliyevin tapşırığı ilə qardaş ölkədə baş verən güclü zəlzələnin fəsadlarının aradan qaldırılması və axtarış-xilasetmə əməliyyatlarına dəstək məqsədilə Fövqəladə Hallar Nazirliyinin ilkin mərhələdə 370 nəfərdən ibarət çevik xilasetmə qüvvələri Türkiyəyə ezam olundu. Xilasedicilərimiz gecə-gündüz demədən dağıntılar altında yalvarışlarla çırpınan insanları qurtarmaq üçün əllərindən gələn fədakarlığı göstərdilər.

Baku TV-yə danışan xilasedicilər dağıntılar altından xilas edilən insanların gözlərindəki sevincin onlara qürur verdiyini söyləyiblər.

“Zəlzələdən bir neçə saat sonra Fövqəladə Hallar Nazirliyinin bütün qüvvə və vasitələri hazır vəziyyətə gətirilərək Türkiyənin Adana şəhərinə, oradan da xüsusi texnikalarla Kahramanmaraş şəhərinə yola düşdü. İlk günlər hətta növbəni təhvil verən şəxsi heyət hadisə yerində qalaraq xilasetmə işini davam etdirirdi. 198 saat sonra iki gənc oğlanın dağıntılar altından çıxarılması qürurverici bir hal kimi yaddaşımızda qaldı”, – FHN xilsedicisi Ruslan Pirəlizadə söyləyib.