2020-ci ildən əvvəlki azərbaycanlılar deyilik | Deputat Rəşad Mahmudova görə əxlaq anlayışı - AMİN

Baku TV-də “Amin” verilişinin yeni buraxılışı yayımlanıb.

Verilişin budəfəki buraxılışında əxlaq mövzusu ətrafında müzakirə aparılıb.

Millət vəkili Rəşad Mahmudov əxlaqlı insan anlayışından söz açıb:

“Hər bir insanın firavanlığını zəruri edən dəyərlər içərisində ən vacibi sağlam düşüncədir. Sağlam düşüncə anlayışının tərifində 3 fəzilət yer alır – ağıl, əxlaq, ədalətli müqayisə etmə bacarığı. Qeyd olunan dəyərləri yaşadan cəmiyyətlər daha işıqlı gələcəyə gedə bilir”.

Millət vəkili qeyd edib ki, insandakı əxlaqi viruslar sağlam olmayan düşüncədən irəli gəlir:

“Əxlaqa zidd olan düşüncələrin beynimizdə yerləşməsi ilə biz əxlaqi cəhətdən xəstələnirik. Əfsuslar olsun ki, bu gün dünyamız mənəvi cəhətdən xəstədir. Zaman keçdikcə bunu daha çox dərk edirik. Bunun başlıca amili isə qarşılıqlı dözümsüzlüyün yüksək səviyyədə olmasıdır. Dünyadakı bütün mənfi proseslərin altında təkəbbür və nifrəti görürük”.

Rəşad Mahmudov Azərbaycanın 44 günlük müharibə ilə dünyaya əxlaq dərsi verdiyini söyləyib:

“Müharibələrdə ölümün olduğu reallıqdır. Amma bu zaman ölkəmiz heç bir sivil insana zərər vermədən, sadəcə müharibənin qaydalarına uyğun şəkildə mübarizə apardı. Geriyə baxdığımızda yalnız qələbəmizlə deyil, həm də əxlaqlı müharibə aparmağımızla tarixə adımızı qızıl hərflərlə yazdıq. Xalqımız 2020-ci ildən əvvəlki kimi deyil. Yeniləndik və bu da hamımızın üzərinə məsuliyyət gətirib”.