300 nəfərlik gizli "WhatsApp" qrupu kəndi necə dəyişir? - KƏNDİNƏ QAYIT

“Kəndinə qayıt” verilişinin yeni buraxılışında Goranboy rayonunun Səfikürd kəndinə səfər edilib.

Rayon mərkəzindən təxminən 7 kilometr məsafədə yerləşən Səfikürd qədim tarixi, özünəməxsus təbiəti və adət-ənənələrini qoruyan sakinləri ilə diqqət çəkir.

Verilişdə kənd sakinlərinin yaratdığı “Doğma kəndimiz” adlı “WhatsApp” qrupundan bəhs olunub. Bildirilib ki, 300-dən çox üzvü olan qrup vasitəsilə kəndin abadlaşdırılması üçün iməciliklər təşkil edilir. Sakinlər həftəsonu bir araya gələrək yolları və ətraf əraziləri təmizləyir, Şəhidlər xiyabanındakı ağac və güllərə qulluq edirlər.

“Qrupun öz nizamnaməsi var. Əsas məqsəd kəndin abadlaşdırılmasıdır. Ayda dörd dəfə, şənbə və ya bazar günləri iməcilik təşkil edirik”, – deyə kənd sakin bildirib.

Səfikürd sakinləri kəndin adət-ənənələrini də yaşadırlar. Tut mövsümündə qadınlar bir araya gələrək bəkməz hazırlayır, təndir çörəyi bişirirlər. Kənd sakini Telli xala bəkməzin hazırlanma qaydasından danışaraq onun tərkibinə heç bir əlavə məhsul qatılmadığını bildirib.

Verilişdə 90 yaşına yaxın Gülnaz nənə ilə də həmsöhbət olunub. Doqquz övlad böyüdən kənd sakini müasir dövrdə valideynlərin uşaq saxlamağın çətinliyindən şikayətlənmələrinə münasibət bildirib.

“Bir uşağa baxmaq çətin deyil. Özlərinə zəhmət vermirlər. Mən doqquz uşaq böyütmüşəm. Onlar bir-birini saxlaya-saxlaya böyüyüblər. İndi də hamısı mehribandır”, – deyə Gülnaz nənə qeyd edib.