ABŞ-nin 5 nüfuzlu universitetinə qəbul olan şagird

Mikayıl Cəfərli Dövlət İmtahan Mərkəzi tərəfindən keçirilən sonuncu buraxılış imtahanında mümkün 300 baldan 297 bal nəticə toplayaraq Naxçıvan birincisi olub.

Muxtar Respublikanın Şərur rayon Kürçülü kənd tam orta məktəbinin məzunu olan Mikayıl əvvəlki illərdə də buna bənzər nəticələr göstərib.

Əsas məqsədi xaricdə təhsil almaq olan Mikayıl Cəfərli bunun üçün qısa zamanda IELTS və SAT imtahanlarına hazırlaşaraq yüksək nəticə əldə edib. Bunun sayəsində o, Amerika Birləşmiş Ştatlarının 5 nüfuzlu universitetinə qəbul üçün dəvət alıb.

Orta məktəbi yüksək nəticə ilə bitirən və dil bilikləri yüksək olan Mikayılın ən böyük arzusu ABŞ-də ali təhsil almaqdır. Əldə etdiyi yüksək imtahan nəticələri ilə başladığı bu yolda var qüvvəsi ilə çalışan Mikayılı daha böyük uğurların gözlədiyindən ailəsi kimi özü də əmindir.