Abşeronda zibil içində yaşayan sakinlərin etirazı

Samur-Abşeron kanalının ətrafında antisanitar vəziyyət yaranıb. Ərazidə məişət tullantıları səpələnib. Ətrafı üfunət bürüyüb.

Sakinlərin sözlərinə görə, məsələ ilə bağlı aidiyyəti qurumlara şikayət etsələr də, ərazini təmizləyən olmayıb.

Samur-Abşeron kanalı Meliorasiya və Su Təsərrüfatı Açıq Səhmdar Cəmiyyətinin balansındadır. Qurumun Abşeron Suvarma Sistemləri İdarəsindən bildirilib ki, kanal mütəmadi olaraq məişət tullantılarından təmizlənir:

“Ərazi sakinlər tərəfindən zibillənir. Bununla bağlı biz dəfələrlə yerli icra orqanlarına rəsmi müraciət etmişik. Ərazidə zibil qutuları yetərincə deyil. Bəzi yerlərdə isə ümumiyyətlə yoxdur”.

Qeyd edək ki, sözügedən kanal Sumqayıt və Abşeron ərazisindən keçir. Həm Sumqayıt, həm də Saray bələdiyyəsi kanala xidmət göstərmədiyini bildirib.

Zibil qutularının qoyulmasına gəlincə isə qeyd olunub ki, ərazidə həyət evləri olduğu üçün məişət tullantıları təyin olunan cədvəl üzrə maşınla daşınır.