Ailəsi tərəfindən tərk edilən, əlilliyi olan dırnaq ustasını kövrəldən sürpriz - ARZUNUN VAXTI

“Arzunun vaxtı” verilişinin budəfəki buraxılışının qonağı əlilliyi olan şəxs Nemət Abdurrahmanov olub.

Xatırladaq ki, Nemət verilişin əvvəlki buraxılışında həyat hekayəsini bölüşmüşdü. O, 6 yaşında maddi çətinlik səbəbilə valideynləri tərəfindən uşaq evinə yerləşdirilib və orada böyüyüb. Hərbi xidmətini başa vurduqdan sonra ailə qurub, iki övladı dünyaya gəlib. Lakin kuryer işləyərkən keçirdiyi ağır yol qəzasından sonra uzun müddət yatağa məhkum qalıb. Doqquz əməliyyat keçirən Nemət həmin çətin dövrdə həyat yoldaşı tərəfindən də tərk edilib.

Öncəki verilişdə o, dırnaq ustalığı sənətini öyrəndiyini, lakin işləmək üçün lazımi avadanlığının olmadığını bildirmişdi. Proqram yayımlandıqdan sonra xeyirxah şəxslər Neməti dırnaq ustası kimi fəaliyyət göstərə bilməsi üçün bütün zəruri ləvazimatlarla təmin ediblər.

O, göstərilən dəstəyə görə minnətdarlığını ifadə edib:

“Beş ildir protez ayaqla yaşayıram və yalnız oturaq vəziyyətdə işləyə bilirəm. İnsana ən böyük dəstək onu iş sahibi etməkdir. Artıq öz çörəyimi özüm qazana biləcəyəm. Dəstək göstərən hər kəsə təşəkkür edirəm”.