Ailəyə dərd üstünə dərd gətirən hadisə | “Duracaqsan, uşaqlarının əlindən tutacaqsan...”

47 yaşlı Niyaməddin Cəfərov 2025-ci ilin fevralında dəm qazından zəhərləndiyindən beyin hüceyrələrinin böyük qismi fəaliyyətini itirib. O gündən yataq xəstəsidir və ambulator müalicəyə ehtiyacı var. Amma qeydiyyatı Naxçıvanda olduğundan paytaxtda müalicəsi sarıdan bir dərdi iki olub.

“50 gün 1 saylı Kliniki Tibbi Mərkəzdə müalicəsi davam etdi. Daha sonra Buzovna Reabilitasiya Mərkəzinə apardıq. Təxminən ay yarım da orada qaldı. Sonra iltihab baş verdi və təzədən 1 saylı Kliniki Tibbi Mərkəzə qayıtdıq. Daha sonra ambulator müalicə üçün evə gətirdik. Binə Qəsəbə Poliklinikasına müraciət etdik, Naxçıvan vətəndaşı olduğu üçün və şəxsiyyət vəsiqəsi olmadığına görə qəbul etmədilər. TƏBİB-ə şikayətdən sonra qəbul etdilər və o vaxt dedilər ki, bütün sənədləri hazır verəcəyik, amma indi vermirlər. ASAN Xidmətə gedib şəxsiyyət vəsiqəsi də hazırlatdım, amma indi də deyirlər ki, Naxçıvan vətəndaşıdır deyə alınmır”, ‒ deyə N.Cəfərovun atası Fikrət Cəfərov bildirib.

Naxçıvan Muxtar Respublikasının Əmək və Əhalinin Sosial Müdafiəsi Nazirliyi və TƏBİB-dən bildirilib ki, bu halda Bakıdakı dövlət tibb müəssisəsi vətəndaş üçün “Əlillik” e-sisteminə göndəriş daxil etməlidir. Sistem göndərişi Naxçıvandakı quruma ünvanladıqda isə vətəndaş Bakıda müayinə üçün Dövlət Tibbi-Sosial Ekspertiza və Reabilitasiya Agentliyinə müraciət edə bilər. Əlillik əlaməti müəyyən edilərsə, təqdim olunan sənədlər əsasında Agentlik tərəfindən əlillik təyinatı aparılır.