Alimlər bunu da icad etdi | Daha elektrik enerjisini yağış damcılarından alacağıq?

Sinqapurdan olan tədqiqatçılar sadə və effektiv bir üsulla yağış damcılarından elektrik enerjisi əldə etməyə nail olublar.

Şaquli borularla təchiz edilmiş bu yeni qurğu düşən suyun enerjisinin 10 faizindən çoxunu elektrikə çevirə bilir ki, bu da ənənəvi fasiləsiz axın texnologiyalarından on min qat daha səmərəlidir.

Qurğu porşen effekti prinsipi ilə işləyir: yağış damcıları dar, şaquli kanallara düşərək içəridə su və hava “növbələşməsi” yaradır. Bu dəyişkən axın elektrik yüklərinin ayrılmasını gücləndirir və hər damcının enerjisini maksimum səviyyədə çıxarmağa imkan verir.

Konstruktor elementlərinə su qülləsi, metal iynə və keçirici polimerdən hazırlanmış incə borular daxildir. Hər borunun uzunluğu 32 santimetr, diametri isə cəmi 2 millimetrdir. Damcıların bu borulara düşməsi nəticəsində yaranan dəyişkən axın yüksək effektivliklə elektrik enerjisi yaradır.

Alimlərin fikrincə, gələcəkdə bu texnologiyanın şəhər infrastrukturlarına inteqrasiyası, eləcə də sensor sistemləri və avtonom elektronika ilə birləşdirilməsi planlaşdırılır.