Antiterror tədbirlərində bir gözünü itirən Sadiq Məmmədov nələri danışdı?

2023-cü ilin sentyabrında keçirilən lokal xarakterli antiterror tədbirləri zamanı qəhrəmanlıq göstərərək yaralanan və qazi olan əsgərlərimizdən biri də 2005-ci il təvəllüdlü Sadiq Məmmədovdur.

2023-cü ilin aprel ayında hərbi xidmətə yollanan Sadiq sonradan Xüsusi Təyinatlı Qüvvələrə seçilib.

O, antiterror tədbirlərində iştirakını xüsusi təyinatlı olmağı ilə əlaqələndirib:

“Xüsusi təyinatlılara getməsəydim, bəlkə də, döyüşlərdə iştirak etməyəcəkdim. Sentyabrın 19-da bizi Xocavəndə apardılar. Günorta saatlarında döyüşlər başladı, Xankəndiyə doğru yönləndik. Sentyabrın 20-si yanıma mərmi düşdü, sol gözümdən yaralandım”.

Sadiq müharibədə iştirak etdiyinə görə qürur duyduğunu deyib:

“Cənab Ali Baş Komandanımızdan da, xalqımızdan da razıyam. Qazi kimi mənimlə hər kəs maraqlanır. Mən fəxr edirəm ki, müharibəni görmüşəm”.

Sol gözünün görmə qabiliyyətini tamamilə itirən Sadiq hələ də müalicələrini davam etdirir.

Qeyd edək ki, Sadiq Məmmədov lokal tipli antiterror əməliyyatlarında göstərdiyi qəhrəmanlığa görə “Hərbi xidmətdə fərqlənməyə görə” 3-cü dərəcəli medalı ilə təltif olunub.