Aprel döyüşlərində nələr oldu? - Şanlı qələbəyə gedən yol

Azərbaycan Ordusunun Aprel qələbəsindən 8 il ötür.

2016-cı ilin martın ortalarından ermənilər atəşkəsi intensiv pozmağa başladılar. Aprelin 1-dən 2-nə keçən gecə isə cəbhə boyu Azərbaycan Ordusunun mövqeləri və yaşayış məntəqələri intensiv atəşə məruz qaldı.

Aprelin 2-dən 5-dək qoşunların təmas xəttində silahlı təxribatlar törədildi. Ermənistan Silahlı Qüvvələrinin təxribatları nəticəsində Azərbaycan Ordusu şəhid verdi, həmçinin mülki əhali arasında da ölən və yaralananlar oldu.

Aprel döyüşləri 1994-cü ildə atəşkəs haqqında saziş imzalandıqdan bəri ən şiddətli döyüşlər kimi tarixə düşdü. Azərbaycan Ordusunun cavab zərbələri nəticəsində 2000 hektardan artıq ərazi erməni işğalından azad olundu və daha çox ərazi əməliyyat baxımından nəzarət altına keçdi. Talış kəndi ətrafındakı yüksəkliklər tam təmizləndi. Geniş ərazini nəzarətdə saxlamaq imkanı verən strateji əhəmiyyətli Lələtəpə yüksəkliyi də Azərbaycan Ordusunun nəzarətinə keçdi.

Aprel döyüşlərində Azərbaycan Ordusu öz gücünü göstərdi. Bunun nəticəsidir ki, 2020-ci ilin sentyabrın 27-də rəşadətli Azərbaycan Ordusu Müzəffər Ali Baş Komandan İlham Əliyevin rəhbərliyi ilə İkinci Qarabağ müharibəsinə başladı 44 gün davam edən Vətən müharibəsi 30 ilə yaxın müddətdə Ermənistanın işğalında qalan torpaqların azad olunması ilə başa çatdı.