Astaralı komandir Ukraynada: azərbaycanlı əsgərlər qətlə yetirilir
Ukrayna prezidenti briqadasında xüsusi təyinatli artilleriya batareyasının komandiri olan Qulamov Teymur Emin oğlu əslən Azərbaycanın Astara rayonundandır. Kiyevdə doğulub böyüyən soydaşımız Ukrayna Ali Hərbi məktəbini bitirdikdən sonra qısa müddət ərzində xüsusi nizam-intizamına və müsbət göstəricilərinə görə prezident briqadasında batareya komandiri vəzifəsinədək irəli çəkilib. Onun rəhbərlik etdiyi batareya hazırda Donetsk vilayətində Baxmut şəhəri istiqamətində ən mühüm tapşırıqları icra edir.
Baku TV-yə müsahibə verən Teymur Qulamov bildirib ki, “Ukraynanın möhkəm ümidləri” adlı xeyriyyə fondu təşkil ediblər. Bu fondun məqsədi zərər dəymiş binaların bərpasına yardım etməkdir:
“Söhbət Buça, Qostomel və başqa ərazilərdəki tikililərdən gedir. Baxmutda da binaların necə dağıldığını görmüşük. İnsanların qalmağa yerləri yox idi. Odur ki, tikinti işlərinə yardım göstərməyə qərar verdik”.
Azərbaycanlı hərbçi Ukraynada çoxlu sayda azərbaycanlı döyüşdüyünü vurğulayıb: “Mənim bölüyümdə də azərbaycanlılar var. Azərbaycanlı qardaşlarımız da döyüşlərdə həyatını itirir, itkin düşürlər. Çalışıram onların hamısını tapım. Bu yaxınlarda mərhum Tərlanın dəfn mərasimi keçirilib. Onun axtarışları bizim tərəfimizdən uzun müddət davam etmişdi”.
Qeyd edək ki, hazırda Teymur Qulamovun olduğu hərbi batareyada Ukraynada yaşayan çox sayda soydaşımız var və onların sayı durmadan artır.