Atası gəlməməlidir ki, qızımı incitmisiniz | Zirədə xonçanı niyə kişilər aparır? - O VAXTLAR

Baku TV-də yayımlanan “O vaxtlar” verilişinin yeni buraxılışı efirə gedib.

Verilişin budəfəki sayında Zirə sakinləri Elşad Kərimov və Qədir Nəcəfzadə köhnə adətlərdən, ailə dəyərlərindən danışıblar.

Q.Nəcəfzadənin sözlərinə görə, Zirə kəndində nişan üzüyünü qız evinə kişilər aparırlar:

“Adətən xonçalar qadınların əlində olur. Amma bizim kənddə nişan xonçalarını kişilər aparırlar. Bunun mənası odur ki, razılığa iki nəslin kişiləri gəlir. Sonra qızın atası cürət edib hər xırda problemə görə durub gəlməməlidir ki, qızımı incitmisiniz”.

Böyük sözü dinləməyən gənclərdən gileylənən Zirə sakini qeyd edib ki, müasir və azad yaşam tərzi xoşbəxt olmaq üçün kifayət deyil:

“Heç kimi dinləməmək, bütün qazancını əyləncəyə xərcləmək insanı uçuruma aparan şeylərdir”.

Zirəli ağsaqqal Elşad Kərimov isə övladları ailə qurarkən onlara verdiyi məsləhətdən danışıb: “Qızımı ərə verəndə dedim ki, bəxtinə nə çıxsa, odur, qurtardı. Övladıma söyləmişəm ki, məni adımla çağıra bilərsən, amma qayınatana “ata” de”.