AZAL təyyarəsində qəza anında nələr yaşandı? | Son Uçuş sənədli film

Baku TV "J2-8243: Son uçuş" adlı sənədli filmi təqdim edir.

Filmdə 25 dekabr 2024-cü il tarixində "J2-8243" nömrəli Bakı-Qroznı reysini həyata keçirən təyyarənin Aktauda qəzaya uğraması nəticəsində həlak olanların, sağ qalanların və onlara yardım edənlərin hekayəsindən bəhs olunub.

Təyyarədə oğlu ilə birlikdə olan sərnişin Tofiq Dərvişov hadisə anından danışıb:

“Təyyarənin eniş xəbəri verildikdən sonra anidən yüksəldi və iki dəfə ard-arda partlayış səsi gəldi. Sonumuzun çatdığını düşündüm. Təyyarənin motor hissəsində qopan parçanı görəndə dedim ki, bizi vurdular.

Hər kəs təşvişə düşmüşdü, bələdçilər bizi sakitləşdirməyə çalışırdılar. Bir saatdan çox təyyarə havada dövrə vurdu. Pəncərədən baxanda dənizin üzərində olduğumuzu gördüm. Əgər təyyarə suya eniş etsəydi, heç birimiz sağ qala bilməyəcəkdik”.

Sağ qalan digər sərnişin Subxonkul Rəhimov qəzada həlak olan baş bələdçi Hökumə Əliyevanın qəhrəmanlığından danışarkən bütün yükün onun üzərində olduğunu söyləyib:

“Bu, hamı üçün çox çətin bir an idi. Ən böyük yük stüardessanın üzərində idi. Təyyarədə olan 62 sərnişin ‒ uşaqlar, yaşlılar, qadınlar ona ümidlə baxırdılar. Onun işi sərnişinləri sakitləşdirmək idi. Bu, çox böyük psixi yükdür. O, həqiqətən də qəhrəmandır”.

Qeyd edək ki, filmin məqsədi yaşanan faciəni və insanların cəsarətini əks etdirərək həyatdan köçənlərin unudulmaması adına bir xatirə saxlamaqdır.