Azərbaycan Xalq Cümhuriyyətinin yaradıcısı Məhəmməd Əmin Rəsulzadənin vəfatından 69 il ötür

Martın 6-sı ictimai-siyasi xadim, publisist, Azərbaycan Xalq Cümhuriyyətinin banilərindən və siyasi mühacirətinin liderlərindən olan Məhəmməd Əmin Rəsulzadənin anım günüdür. Onun vəfatından 69 il ötür.

Məhəmməd Əmin Rəsulzadə 1884-cü il yanvarın 31-də Bakının Novxanı kəndində anadan olub. 1902-ci ildə hələ 17 yaşında olarkən Müsəlman Gənclik Təşkilatını yaradıb. Bu, XX əsrdə Azərbaycanda rus müstəmləkə üsuli-idarəsinə qarşı gizli mübarizə aparan ilk siyasi təşkilat idi. 1917-ci ilin payızında Məhəmməd Əmin Rəsulzadə Rusiya parlamentinə Azərbaycan və Türküstandan millət vəkili seçilib.

1918-ci il mayın 26-da Zaqafqaziya Seymi daxili fraksiyaların çəkişmələri nəticəsində ləğv olunub. Həmin ayın 27-də Seymin müsəlman fraksiyasına daxil olan müxtəlif partiyaların üzvlərindən ibarət Azərbaycan Milli Şurası yaranıb. Səs çoxluğu ilə Məhəmməd Əmin Rəsulzadə Milli Şuranın sədri seçilib.

1918-ci il mayın 28-də müxtəlif ölkələrin radiostansiyaları və qəzetləri Azərbaycan istiqlaliyyətinin elan olunmasını dünyaya yaydılar. Lakin Azərbaycan Xalq Cümhuriyyətinin ömrü cəmi 23 ay çəkdi. 1920-ci ilin 28 aprelində Azərbaycanın Sovet Rusiyası tərəfindən işğalından sonra Məhəmməd Əmin Rəsulzadə Vətəni tərk etmək məcburiyyətində qaldı.

Uzun illər doğma ölkəsindən kənarda Azərbaycanın azadlığı uğrunda mübarizə aparan M.Ə.Rəsulzadə 1955-ci il martın 6-da Ankarada şəkər xəstəliyindən vəfat edib.