Azərbaycana qanunsuz yolla gəlmək istəyənlər ifşa edildi

Hindistan polisi vətəndaşları qanunsuz yolla Azərbaycan və digər ölkələrə göndərmək istəyən qruplaşmanı ifşa edib. Dehli Şəhər Polisinin Cinayətkarlıqla Mübarizə üzrə Şöbəsi hindistanlıları xarici ölkələrə qeyri-qanuni yolla məskunlaşmaq üçün göndərmək istəyən 4 nəfərdən ibarət cinayətkar qruplaşmanın üzvlərini həbs edib.

Məlumata görə, həmin şəxslər bir turizm şirkəti adı altında qanunsuz fəaliyyət göstəriblər. “Bhandari” adlı şəxs qruplaşmanın arxasında duran təşkilatçıdır və o, təxminən 12 il əvvəl polisin diqqətini cəlb etməmək üçün səyahət və turizm biznesi açaraq bu işə başlayıb.

Qruplaşmanın bütün səfirliklərin yerləşdiyi paytaxt Dehlidə agentləri, Salvador və Meksika kimi ölkələrdə tərəfdaşları var. Onlar müxtəlif ölkələrin 80 pasportunu, eləcə də müxtəlif şirkətlərin çoxlu möhürlərini və reketçilikdə istifadə olunan hər cür saxta sənədləri ələ keçiriblər. Həbslər və müsadirələr son vaxtlar bu cür fırıldaqların sürətlə artmasından sonra başlayıb.

Məlumata görə, qruplaşma hindistanlıları ABŞ-ə göndərmək üçün əsasən 2 marşrutdan istifadə edib: Bakı-İstanbul-Salvador və Avropa-Meksika. Polisin məlumatına görə, qruplaşma üzvləri bank çıxarışları və vergi bəyannamələri kimi saxta sənədlər hazırlamaq üçün kompüter proqramlarından istifadə ediblər. Lakin cinayətkarların qanunsuz yolla sərnişin göndərməyə nail olub-olmadıqları hələ məlum deyil.