Azərbaycanda narkotiklə bağlı dəhşətli faktlar | Təhlükə getdikcə artır

2024-cü ilin yanvar-sentyabr ayları ərzində qanunsuz 5 ton 480 kiloqramdan çox narkotik vasitələr və psixotrop maddə dövriyyədən çıxarılıb.

Bu barədə Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasından məlumat verilib.

Qeyd olunub ki, bu istiqamətdə ümumilikdə 7668 cinayət faktı aşkarlanıb. Onlardan 2402-si narkotik vasitələrin qanunsuz satışı, 5040-ı narkotik vasitələrin qanunsuz əldə edilib saxlanılması, 221-i narkotik tərkibli bitkilərin qanunsuz əkilib becərilməsi, 5-i isə digər cinayətlərlə bağlı olub.

Bununla yanaşı, 1434 hektardan çox sahədən 2 854 755 ədəd yabanı halda bitən narkotik tərkibli bitkilər müəyyən olunaraq müvafiq qaydada məhv edilib.

Qanunsuz dövriyyədən çıxarılan 5 ton 480 kq-dan çox narkotik vasitələrin və psixotrop maddələrin ümumilikdə dəyəri 130 milyon 931 min manat kimi qiymətləndirilir.

Cinayət məsuliyyətinə cəlb olunan 5781 nəfərdən 5621-i kişi, 160-ı qadındır. 48 nəfər xarici ölkə vətəndaşıdır. Narkotik vasitələrin və psixotrop maddələrin qaçaqmalçılıq yolu ilə ölkəyə gətirilməsi ilə bağlı 192 fakt aşkar edilib.

Ümumilikdə aşkar edilən cinayətlərin 249-u qrup halında törədilib. 2443 cinayət faktı əvvəllər məhkum olunan şəxslər tərəfindən törədilib.

2023-cü ilin yanvar-sentyabr ayları ilə müqayisədə 2024-cü ilin müvafiq dövrü ərzində aşkar edilən faktların sayı azalıb. Bununla yanaşı, qrup halında olan cinayətlərin sayı isə 8 fakt artıb.