Azərbaycanda pomidor ucuzlaşdı | İqtisadçı səbəbləri açıqladı

Qışdır, mövsümü deyil, amma əvvəlki illərlə müqayisədə pomidorun ucuzlaşması müşahidə edilir.

Satıcılar qiymətin aşağı düşməsini məhsulun bol olması ilə əlaqələndirirlər. Lakin bazarda hər qiymətə pomidora rast gəlmək mümkündür.

İqtisadçı Xalid Kərimli isə satıcılarla razılaşmır. O deyib ki, pomidorun ucuzlaşması bolluqla bağlı deyil. Çünki ölkədə pomidor istehsalında ciddi artım müşahidə edilmir:

“Qeyri-mövsümdə bazara məhsul istixanalardan göndərilir. İstixanalar istehsal etdiyi məhsulu ya daxili bazara çıxarır, ya da Rusiya, Belarus, digər MDB ölkələrinə ixracı həyata keçirilir. Məhsulun xarici bazara göndərilməsində müxtəlif çətinliklər ola bilər. Bu zaman daxili bazara daha çox məhsul çıxarılır. Əhalinin alıcılıq qabiliyyətinin məhdud olması isə ucuzlaşmaya gətirib çıxarır”.

Qeyd edək ki, Dövlət Gömrük Komitəsinin məlumatına görə, 2022-ci illə müqayisədə 2023-cü ildə pomidor ixracının həcmi 0,6, dəyəri isə 3,35 faiz azalıb.