Azərbaycanda şəkər tozu qıtlığı yaşanır?

Azərbaycanda pərakəndə və topdan satılan şəkər tozunun qiymətində artım müşahidə edilir.

Pərakəndə satılan şəkər tozunun bir kiloqramının qiymətində 10-20 qəpik, topdan satılan şəkər tozunun qiymətində, yəni 50 kiloqramlıqlarda isə 3-4 manat artım olduğu bildirilir.

Satıcılar bahalaşmanı kompot, mürəbbə sezonu olması ilə əlaqələndirirlər: “Tələbat artdığı üçün qiymətləri qaldırırlar. Əvvəl 5 idisə, indi 10 kisə sifariş veririk. Təkcə 5-ni göndərirlər. Bu o deməkdir ki, qıtlıqdır”.

Məsələ ilə bağlı iqtisadçı Elşad Məmmədov deyib ki, dünya bazarında qiymətin artması daxili bazarda da özünü göstərməkdədir: “İnhisarçılıq meyllərin mövcud olması qiymətlərin artan xətt üzrə inkişafına şərait yaradır. Eyni zamanda ölkədə istehsal üçün lazım olan kreditlə bağlı problemlər var. Bununla yanaşı, suvarma təşkili ilə bağlı problemlər də yerli istehsalı qiymət baxımından daha az rəqabətli edir”.

İqtisadçı idxaldan asılılığın azaldılmasını zəruri hesab edir. Payız aylarında qiymətlərin daha da bahalaşacağı da istisna deyil.