Azərbaycanın fəth etdiyi yeni zirvə

Dünyanın 130 ölkəsindən rekord sayda – 2700-dən çox siyasətçi və iş adamının, o cümlədən 52 hökumət və dövlət başçısının iştirak etdiyi Davos Forumu ölkəmiz üçün xüsusi önəm kəsb edir.

Forumda iştirak edən Prezident İlham Əliyev bir çox liderlər və nəhəng beynəlxalq şirkətlərin rəhbərləri ilə təkbətək görüşlər keçirib. Bu görüşlər əsnasında ölkə başçısı tərəf müqabillərinə həm də regional vəziyyət haqqında ətraflı məlumat verib. Xüsusilə Ermənistan və Azərbaycan arasında münasibətlərin normallaşdırılması, bu məsələdə Ermənistanın sərgilədiyi destruktiv mövqe, Azərbaycanla sülh müqaviləsinin imzalanmasına mane olmaq üçün uydurulan müxtəlif bəhanələri və danışıqlar prosesindən yayınmaq cəhdləri geniş müzakirə mövzusu olub.

Məlumdur ki, Ermənistan və onun havadarları beynəlxalq arenada Azərbaycana qarşı hansısa sanksiyaların tətbiq edilməsi, ölkəmizin beynəlxalq aləmdən təcrid edilməsi ilə bağlı iddialarla çıxış edirlər. Amma Davos Forumu bu iddiaların həqiqətə uyğun olmadığını və Azərbaycanla müxtəlif sferalarda əməkdaşlıq etmək istəyən tərəflərin sayının gündən-günə artdığını növbəti dəfə göstərdi.