Babayan və Mnatsakanyan ittihamları inkar etdi

Ermənistanın Azərbaycana qarşı hərbi təcavüzü nəticəsində çoxsaylı cinayətlər törətməkdə təqsirləndirilən Ermənistan Respublikasının vətəndaşları – Araik Arutyunyan, Arkadi Qukasyan, Bako Sahakyan, Davit İşxanyan, David Babayan, Levon Mnatsakanyan və digərlərinin barəsində olan cinayət işləri üzrə açıq məhkəmə prosesinin baxış iclası keçirilib.

David Babayan ittiham tərəfinin çıxışında bildirdiklərinə əks dəlillər səsləndirib. O, təqsirləndirilən şəxslərin günahsız olduğunu deyib.

Levon Mnatsakanyan isə müharibədə onlar tərəfindən muzdluların döyüşməsi barədə ittihama münasibət bildirib. Onun sözlərinə görə, həmin şəxslər muzdlu yox, könüllülər olub.

Mnatsakanyan 2020-ci ildə 44 günlük müharibə zamanı Şuşakənddə hərbi hücumun planlaşdırılmasında iştirakını da inkar edib. Ümumiyyətlə 2020-ci və 2023-cü ildə heç bir hərbi əməliyyatda iştirak etmədiyini söyləyib.

“Müşavirədən mənə aydın oldu ki, orada üç ehtiyat, bir tank batalyonu və bir artilleriya divizyonu döyüş üçün hazırlanıb. Həmin əməliyyat nəticəsində yol bağlanmalı idi. Hansı ki orada təchizat işləri görülürdü, yəni hərbçilər təchizatla təmin edilirdilər. Şuşaya hücum hazırlayan silahlı qüvvələrin məsul şəxsi Samvel Babayan idi”, – deyə Mnatsakanyan əlavə edib.

Təqsirləndirilən şəxs 2016-cı ildə baş verən Aprel döyüşləri barədə danışarkən həmin vaxt “ordu komandanı” olduğunu diqqətə çatdırıb. O, Aprel döyüşləri ilə bağlı ittiham tərəfinin dəlillərini və zərərçəkmişlərin dediklərini inkar edib, Azərbaycan hərbçilərinin mövqelərinə hücum etmədiklərini deyib.