Bakıda 4 dəfə həbs edilib, azad olunan kimi arvadını qətlə yetirən şəxs

Həyat yoldaşı 34 yaşlı Tacirə Salmanovanı çoxsaylı bıçaq zərbələri ilə qətlə yetirməkdə təqsirləndirilən Yevlax sakini Teymur Məmmədovun cinayət işi üzrə məhkəmə hazırlıq iclası keçirilib.

Bakı Ağır Cinayətlər Məhkəməsinin hakimi Əli Məmmədovun sədrliyi ilə baş tutan prosses zamanı müttəhimin anket məlumatları dəqiqləşdirilməklə yanaşı, məhkəmənin tərkibi barədə məlumat iştirakçıların diqqətinə çatdırılıb. Məhkəmə müşavirədən sonra ilk baxış iclasının vaxtını təyin edib.

Qeyd edək ki, Teymur Məmmədov əvvəllər də Cinayət Məcəlləsinin müxtəlif maddələri ilə 4 dəfə məhkum olunub. O, sonuncu dəfə həbsdən azad olunandan 4 gün sonra həyat yoldaşını qətlə yetirməkdə şübhəli bilinərək saxlanılıb. Buna səbəb kimi isə onun həyat yoldaşının narkotik maddə aludəçisi olduğuna şübhələrinin olması bildirilsə də, bu iddia məhkəmə-tibbi ekspertizası zamanı öz təsdiqini tapmayıb.

Teymur Məmmədovla Tacirə Salmanovanın birgə nikahdan 4 övladları var. Qətlə yetirilən Tacirə Salmanova həyat yoldaşı həbsxanada olduğu zaman üzərlik satmaqla övladlarını dolandırıb.

İş üzrə keçirilən məhkəmə-tibbi ekspertizasının rəyinə görə, Tacirə Salmanovanın meyitinin üzərində 19 bıçaq xəsarəti müəyyən edilib. Təqsirləndirilən Teymur Məmmədov Cinayət Məcəlləsinin xüsusi amansızlıqla adam öldürmə maddəsi ilə ittiham olunur.