Bakıda gənclərin "ölüm şousu": DİN araşdırmalara başladı
Ölkə ərazisindəki magistral yollardan birində gənclər yol hərəkəti qaydalarını pozublar. Onlardan biri ayağını pedaldan çəkərək yerinə idman ayaqqabısı qoyub və maşını bu formada idarə edib.
Bu azmış kimi sükan arxasında da normal əyləşməyən gənc özünə və ətrafındakılara qarşı təhlükəli anlar yaşadıb. Kobud qayda pozuntusu ilə bağlı Baş Dövlət Yol Polis İdarəsində araşdırmalara başlanılıb.
Qurumun baş inspektoru Toğrul Nəsirlinin sözlərinə görə, dəfələrlə edilən xəbərdarlıqlara, görülən tədbirlərə baxmayaraq, hələ də yol hərəkəti qaydalarına məhəl qoymayaraq özü ilə yanaşı, digər hərəkət iştirakçılarının da həyatını təhlükəyə atan sürücülər mövcuddur. Sosial şəbəkədə yayılan məlum görüntüdəki nəqliyyat vasitəsinin sürücüsü barəsində də qanunamüvafiq tədbirlər görüləcək.
Ekspertlər isə hesab edir ki, sürücülük məktəblərində yol hərəkəti qaydaları ilə bağlı düzgün maarifləndirmə siyasəti aparılmır.
Qeyd edək ki, yayılan görüntülər sosial şəbəkələrdə də ciddi qınağa səbəb olub.