Bakıda güclü yağışdan sonra yaranan mənzərə

Gecə saatlarından Bakıda müşahidə olunan leysan xarakterli yağış paytaxtın bir sıra küçə və prospektlərində nəqliyyatın hərəkətində çətinliklərə səbəb olub.

İri Şəhərlərin Birləşmiş Su Təchizatı Xidməti güclü yağışlardan sonra yollarda və digər yerlərdə suyun yığılması ilə bağlı yaşanan çətinliklərə görə açıqlama verib.

Qeyd olunub ki, intensiv yağıntılar zamanı yağış sularının ətrafa toplanması halı müəyyən ərazilər üzrə müşahidə edilir.

Məlumatda vurğulanıb ki, drenaj sistemlərinin qurulmadığı yollarda və ərazilərdə yağış suları tullantı su xətlərinə yönləndirilir:

“Bu hal isə kanalizasiya şəbəkələrinin artıq yüklənməsinə və suların daşınmasında maneələrin yaranmasına səbəb olur. Həmçinin elə ərazilər də var ki, orada təchizat sistemi mövcud deyil. Bu kimi ərazilərdə yaranan problemlərin aradan qaldırılması məqsədilə İri Şəhərlərin Birləşmiş Su Təchizatı Xidməti gücləndirilmiş iş rejimində fəaliyyət göstərir.

Tullantı su şəbəkəsi mövcud olmayan ərazilərə müvafiq sukanal idarələrinin qəza briqadaları cəlb edilərək istismar qaydalarının mümkün şərtləri çərçivəsində yığılan suyun maşınlar vasitəsilə qismən və ya tam çəkilməsi təmin edilir”.

Bildirilib ki, hazırda Xidmət tərəfindən icra olunan bir sıra irihəcmli layihələr tullantı sularının idarə edilməsinə, ekoloji vəziyyətinin yaxşılaşdırılmasına və intensiv yağışlar zamanı subasma hallarının qarşısının alınmasına imkan yaradacaq.